2013年2月14日 星期四

書寫烏面撈飛



你有看過鳥仔無?你識幾種鳥仔?台南有一種鳥仔通世界有名,伊著是烏面撓pue。現此時,通台灣攏攏知影,伊是一種珍貴,tī 世界上 強beh 絕種 ê 鳥仔;伊每年攏 ē 來台灣南部過冬,這時,新聞攏 ē 放送「烏面撓pue來--矣」ê 消息。誠濟民眾聽著這个消息,就 ē 興 tshih-tshih 來到台南七股,曾文溪口附近欣賞 tsia 由遠方來 ê 貴客。


烏面撓pue今仔日 ē-tàng 放心 tī 台灣過冬是一件無簡單 ê 代誌。台灣上早有紀錄著烏面撓pue是 tī 1863年,英國人Swinhoe tī 淡水河觀察著兩隻烏面撓pue,後來,tī 日本時代,雖然 mā 有紀錄,但是系統性 ê 研究猶原欠缺。一直到1989年,台灣烏面撓pue tsiah 有正式 ê 調查報告。但是仝彼个時陣,台南縣政府 beh 推動 ê「七股綜合開發計畫」suah 來威脅著烏面撓pue ê 生存。為著 beh 予民眾瞭解這種珍貴 ê 鳥仔,以及替 in 爭取生存 ê 空間,濟濟學者,攏 tī 這時來趕緊研究烏面撓pue。Gún 真幸運,bat 參 tshia ê 先行者做伙 phah 拚。

彼年,guá tsiah 20歲,誠濟代誌 guá 攏閣 m̄ bat;guá 是生物系 ê 學生,肩胛頭自然就揹起無人可比 ê 使命,心中有萬分 ê 熱情,為著瞭解大自然,為著這群鳥仔 kap in ê 生存,gún 甘願來做戇代誌;青春 kap 體力攏 tī 魚塭仔邊 leh jiok 鳥仔 ê 時予風吹散--去--loo。

烏面撓pue主要 tī 北韓生湠,寒人 ê 時 ē 來到台灣,日本,南韓,中國 ê 香港,澳門,深圳,海南島 kap 越南 ê 紅河口等地過冬。Tī tsiah-nih-tsuē 所在內底,烏面撓pue上愛台灣。2007 年 ê 調查記錄顯示出全球有47% ê 烏面撓pue攏 tī 台灣過冬,而且,in 上愛 ê 過冬地就是曾文溪口地區。這是為甚 mih -- neh? 原來,這是人類活動 kap 大自然和諧 ê 結果。

你若是來到台灣 ê 上西角 — 曾文溪口,你 ē 看著一片闊闊 ê 天 khàm tī tsi̍t-ê 閣 tsi̍t-ê 魚塭仔 kap 一大片 ê 濕地,浮洲仔頂頭。靠近海 ê 所在,三面有長長 ê 堤岸;這長長 ê 堤岸,限制了車 ê 活動,因此減少了對烏面撓pue ê 攪吵。 來到這,欣賞自然環境 kap 人文地貌上心適 mā 上舒適 ê 方式,就是騎著鐵馬,靜靜-- á 來看一切 ê 奧妙。Tsit-ê 所在,白翎鷥是在地 ê 主人,in ē 對 tsit-ê 魚塭仔飛去hit-ê 魚塭仔揣 mih 來食。看 ē 著白翎鷥 ê 所在,就 ē-tàng 看著烏面撓pue — in ē 對 tī 白翎鷥 ê 尻川後,來到魚塭仔掠魚食。烏面撓pue參白翎鷥仝款攏 ē 唱歌,m̄-koh,in ê 歌聲誠歹聽;若親像 bē 曉挨弦仔 ê 人 tī-leh 烏白挨,閣若親像破坑 ê 鼓吹聲。

除了四界飛,tī 魚塭仔內底揣食,烏面撓pue每 tsi̍t 工攏愛開真濟時間 tī 浮洲仔抑是濕地頂歇睏,整理鳥仔毛 kap 交際應酬。啥?鳥仔 mā 愛交際?無錯,in 就像人仝款,有共同生活  ê 團體。十幾冬前,tī-leh 海風呼呼叫,空氣冷支支 ê 曾文溪口,guá 參作夥研究 ê 伴,透過望遠鏡,看著 tsiūⁿ 百隻 ê 烏面撓pue tsi̍t 排閣 tsi̍t 排,其中每一隻 ê 姿態攏無仝款;有 ê 頷 á 頸 khiau-khiau,頭 lê-lê,無閒 leh 整理家己 ê 羽毛;有 ê 將翼仔股伸長長,迎風舞動。有 ê 烏面撓pue ē 互相幫贊來整理羽毛,相親相愛;有時陣,in mā ē 起冤家,喙 khui--khui-khui,兩支翅股 thí-kah 羽毛 tshàng--tshàng-tshàng,好親像 beh 將對方拆食落腹。

烏面撓pue平常時生湠,晟養後代 ê 所在是 tī 寒冷 ê 北方。寒--人傷冷 ê 時,in 著來到溫暖 ê 南國,熱--人,in tio̍h-koh 轉去北國秋清;所以 lán 講烏面撓pue是走徙性 ê 鳥仔。Lán 台灣著親像 in 一生 ê 旅途中暫時歇睏 ê 重要旅舍,in 來這予 lán 招待,mā 予 lán ê 生態環境 koh-khah 精彩鬧熱。 每年,九月底十月初 in 來到台灣,隔年三月,當花漸漸 leh 開,天漸漸 leh 燒熱,就是 in 參 lán 相辭 ê 時。

天氣好 ê 時陣,曾文溪口附近是予閃爍著金光 ê 溪水,魚塭仔,ia̍h-koh 有透藍 ê 天圍起來。落雨 ê 時,這是 tsi̍t-ê 水鄉,萬物攏 leh 洗身軀 — 洗了輕鬆,歡呼。每年,魚塭仔當 leh 使用 ê 時,水位傷深,無適合烏面撓pue來揣食;等到秋天以後,大部份 ê 魚塭仔攏已經收成,漁民 ē 將魚塭仔內底 ê 水抽走,只tshun淺淺 ê 水 kap 一寡無經濟價值 ê 雜魚仔 。Tsit-ê 時陣通常 kap 烏面撓pue來台灣 ê 時間仝時;使用過 ê 魚塭仔 tú-tú-á-hó 是 in 揣 mih 來食 ê 好所在;這,敢毋是人工奇巧 kap 大自然奧妙 ê 完美配合?

經過十外冬各方面 ê 走 tsông,「七股綜合開發計畫」最後被阻擋 tiâu,烏面撓pue歇睏,過冬 ê 所在才保留落--來。烏面撓pue是規 ê 生態網路 ê 一分子,伊若是滅絕去,表示 lán ê 生態環境將面對背後閣 khah 大 ê 危機。好加哉,lán 為 in 保留了一片 ê 土地,mā 留下了人 kap 天共同 ê 空間。

(原刊tī臺江臺文頭期)


沒有留言:

張貼留言

這篇文章讓你有什麼感覺/感想呢?請讓我知道。

Related Posts Plugin for WordPress, Blogger...