2013年2月14日 星期四

讀「台灣,苦悶的歷史」


關係王育德先生ê紹介,已經有真濟,tsia就m̄免閣加講。逐家lóng知影,伊是一位語言學家,對台語有做過真深入ê研究,m̄-koh,除了台語,伊mā有研究過台灣歷史,mā就伊ê研究寫出一本冊-台灣,苦悶ê歷史;這篇文章,就是beh來簡單探討這本冊ê內容kap價值。

「台灣,苦悶ê歷史」是tī史明先生ê大作「台灣人四百年史」出版以後才寫ê冊。為啥mi̍h已經有「台灣人四百年史」閣需要有tsit本冊--neh?「台灣人四百年史」規本冊有一千五百外頁,是一本內容海量閣詳細ê歷史冊,一般人提著tsiah-nih大本ê冊,真少ē當自頭到尾tsiâu讀。王育德先生寫作「台灣,苦悶ê歷史」,用意就是希望hōo人方便帶tī身軀邊,隨時ē當讀,甚至坐捷運ê時mā ē使一手khiú牽仔,一手輕鬆提冊來讀;一般人若提著án-ne ê歷史冊敢m̄是khah無壓力?就án-ne,王育德先生將「台灣,苦悶ê歷史」寫做一本細細本ê冊(其實mā是有上百頁,我手頭這本中文翻譯本就有258頁囉),伊希望這本細本冊ē當成做人手一本ê台灣歷史冊,án-ne對認捌台灣歷史一定有真大ê幫贊。

這本冊相對「台灣人四百年史」是真細本,這是伊ê優點,mā是伊ê欠點。因為細本,所以有一寡所在交代了無夠清楚,mā因為細本,規本冊suah欠缺所引用ê資料kap文獻。除了tsia,這本冊閣有tsi̍t-ê讀者應該ài斟酌ê所在;這本冊是1960年初版(日文版),1970年代才有中文翻譯ê版本;tng當時,台灣歷史研究tī台灣本土是受著限制甚至被禁止ê,台灣mā無對外開放,外國學者真歹進入台灣(m̄免講,王育德先生更加是無可能tī台灣行動囉)。所以,伊ê台灣歷史研究kan-ta ē當利用一寡歷史文獻kap別人研究過ê二手資料。因此,這本冊內底講ê台灣歷史,iáu閣有無完整或者是無正確ê所在。讀者ài謹記,經過半世紀ê時間,台灣歷史ê研究已經有真大ê進步,真濟過去無注意著ê史料閣hōo人重新發現,學著mā建立真濟新ê看法,理論kap解說。

若án-ne,這本冊價值tī tó-uī?我認為,這本冊延續著「台灣人四百年史」ê架構,按照來過台灣ê政權kā台灣歷史分期:荷蘭,鄭氏,清國,日本,中國國民黨統治;到tsit-má,這套歷史分期ê架構,猶原hōo歷史學家leh使用。閣來,是這本冊上重要ê:建立tsi̍t-ê全新ê歷史觀點。若講「台灣人四百年史」建立ê是殖民史觀(台灣長期hōo人殖民ê歷史觀點),描寫充滿憤慨、悲情ê台灣歷史;「台灣,苦悶ê歷史」當然有繼承tsit-ê觀點,但是伊閣進一步提出「台灣問題ê解決」、「解決台灣ê問題就ē使解決中國ê問題」。中國ê問題是啥mi̍h?Tng當時(冷戰時期),共產中國是世界ê大問題,現此時,lôo-muâ中國tī全世界來講猶原閣是真大ê問題矣!台灣ê問題閣是啥--neh?就是kap中國縛做伙!因為,渡過烏水溝,來台灣釘根、生湠ê先民,tī久長ê時間內底,早就liâu-liâu--仔、自然而然,發展出「台灣人」ê概念,這種概念發展到落尾就是「台灣,是台灣人ê台灣」;蔣氏政權(tsit-má是馬氏政權)睹強kā台灣縛入去中國,是leh違反歷史ê進展,台灣人ê自然;這款違背天理ê代誌造成台灣人民真濟悲劇,mā引起台灣tī政治、經濟、教育各方面ê問題。因此,王育德認為,自1945年到tann,是台灣人kap中國人全面仙拚仙ê時期,是台灣人kap中國人ê民族鬪爭(這點,後--來台獨聯盟前主席黃昭堂先生有繼續發展,寫做一本冊『台灣那想那利斯文』),是台灣uì殖民地ê狀況解脫出來ê運動,更加是四百年台灣史努力ê目標。總講一句,王育德先生uì悲情ê歷史內底揣著台灣ê出路-kap中國徹底切割,建立真真正正屬於台灣人ê國家,台灣各方面才ē有出路啦。為啥mi̍h án-ne做,同齊ē當解決中國問題?因為,成做華人大量移民生湠ê台灣,一旦有能力證明脫離中國逐家過了閣重倍好,這ē鼓勵全世界ê華人放棄對「祖國」ê空思夢想,骨力溶入去當地社會,為家己美好ê生活來拍拚;若是án-ne,中國共產黨當然mā無法度閣再宣傳in受著華僑ê支持--囉。

這是王育德先生tī韓戰結束以後,自由國家kap共產國家關係上緊張ê冷戰時期內底所提出來ê歷史觀點。雖罔tsit-má冷戰已經結束,蘇聯已經解體,中國suah變做上大ê共產國家,而且伊有𤆬領第三世界ê扮勢,因此,共產中國kap自由世界ê緊張關係原在在,mā因此王育德提出ê歷史觀點猶原無退流行,猶原實用-台灣若無建立家己ê國家,伊若真正去hōo中國縛進去,共產中國一定ē閣khah tshàng-tshui,伊tō愈有信心恢復中國帝國ê光榮,án-ne,造成全世界緊張ê中國問題恐驚ē愈害矣!Beh避免這種緊張發生,台灣啊!你iàu-sī khah緊建國矣!

王育德先生ê史觀,mā是伊一生奮鬥ê指導;伊一生骨力拍拚攏是leh做台灣獨立建國運動。這本冊-台灣,苦悶ê歷史-上大ê價值就是台灣建國史觀ê建立。法國哲學家R. Aron捌講過:「歷史是現此時ē思考ê,痛苦ê,有活動能力ê人揣著研究過去ê現實利益所產生出來ê。」,王育德先生研究台灣史揣著台灣建國這條路,lán tsit-má是m̄是仝款閣揣ē著--neh?

(http://avanguardbook.pixnet.net/blog/category/2664747)

(本文發表tī臺江臺語文學季刊第四期)

Related Posts Plugin for WordPress, Blogger...