2013年2月14日 星期四

記楊逵文學音樂節


台中有一个「東海花園」,m̄知你有去--過-無?東海花園bat蹛一个作家、勇士-楊逵,你kám bat?

「東海花園,過去是楊逵寫作、文人聚會ê所在,目今suah tī台中市pha-hng。Kám講是咱大腦無--去?Ia̍h是心臟bē koh跳?無--者,咱按怎ē-tàng kā伊放bē記?」


M̄-tsiah uì 2011年秋天到2012年春天,勇士ê後代- 楊翠 tshuā勇士規个家族,koh有一陣少年勇士,做伙舉辦四場相接suà ê「楊逵文學音樂節」:Tī台灣文學館,tī新化(楊逵出世ê所在),tī新竹清華大學(楊逵ê kan仔孫負責規場活動),最後tī台中舉辦;台中,有首陽園ia̍h有東海花園,是楊逵一生上精彩ê所在啊!


Kah土地倚近,用身軀勞動,替弱者出聲。」Tse就是楊逵精神。除了tse,楊逵mā真愛音樂,所以tsit擺ê活動,邀請著真濟音樂工作者,用音樂來傳達楊逵精神,mā集合眾人來共同造樂,創作出楊逵ê音樂,表現出音樂ê楊逵!


4月28落雨ê hit一工,逐家真有精神重新tuè楊逵tī台中ê跤跡行踏,最後行到東海花園,看著刻tī楊逵墓牌頂ê和平宣言-為著tse百外字,楊逵坐監十二冬;koh食着楊逵發明ê野菜糜,喙內、心肝頭lóng受着作家勇士ê精神感動。雨停,音樂會開始,楊逵ê大漢查某孫-楊翠,用真感性ê語言來kā逐家講,伊希望楊逵文教協會ē-tàng趕緊成立(tsit-má是籌備會niâ),mā希望東海花園ē-sái變做真有意義ê楊逵記念館,hō͘楊逵精神thìng好傳承--落-去,hō͘勇士ê形影繼續tī 咱 ê土地上徛thîng-thîng!


(本文ê台文寫作遵照教育部公佈ê台灣羅馬字)

(本文發表tī2012年5月第218期台文通訊BONG報)


沒有留言:

張貼留言

這篇文章讓你有什麼感覺/感想呢?請讓我知道。

Related Posts Plugin for WordPress, Blogger...