Nā-sī 賴和 ē hiáu siá Lô-má jī

賴和，人稱「台灣新文學之父」。伊自細漢受ê教育，使伊有誠深厚ê漢學底；伊一生中ê文章，全部攏無使用日語創作，這是伊ê堅持mā是伊對殖民者ê抗議。賴和有誠濟寫誠好ê漢詩，毋過，伊mā有一寡重要ê作品是用母語創作出來ê。比論講，「一個同志的批信」tio̍h是一篇完全用台語寫ê小說，「富戶人的歷史」mā是伊另外一篇重要ê台語小說。「相思歌」是大家攏誠愛講起ê一首賴和ê台語詩，內底描寫tio̍h女子談戀愛ê微妙心情。「呆囝仔」是寫予in查某囝仔ê詩﹣規首攏是用台語寫ê。Án-tsia看起來，賴和ê白話文創作，不但為台灣新文學（白話文文學）開創一條新ê路，伊mā是近代台灣母語創作ê先行者之一。

Tsham賴和共一个時代ê人，會曉使用「北京語」ê人並無濟。甚至賴和本人，tī寫作時ê思考可能mā是用台語來進行ê。但是，這種方式寫出來ê mih， kap平常時講ê話，有 bē 少 tseng-tsha，致使賴和開始思考直接用母語創作ê可能性。當賴和開始gia̍h筆書寫家己ê母語時，伊suah tn̄g-tio̍h 一个問題：有聲無字，台語ê寫作beh án-tsóann 進行？

Ùi賴和ê寫作年表來看，伊ê母語創作大部份 tī 1930 年左右才出現。這ē時陣mā是頭一遍台灣本土文學論戰ê時陣。蔡培火主張用羅馬字來書寫台語，但是黃石輝 suah 無認同羅馬字，顛倒主張用漢字書寫台語，遇到無字thang寫ê時陣，tio̍h用借字ê方式解決。賴和無可能毋知影蔡培火kap黃石輝ê主張，而且看起來伊lo̍h-bóe選擇支持黃石輝ê意見 — 這可能kap賴和深厚ê漢學仔底有關係，若beh伊接受「羅馬字mā是字」khah 困難。

賴和tī母語創作中所tú-tio̍h ê 困難，是因為tshūe無適當ê漢字來表達台語ê意思。其實，賴和 tú-tio̍h ê 問題 tsham tsit-má 做翻譯 khang-khùe ê 人 是共款 ê。 一款語言承載一款文化，「翻譯」就是用某種語言來表達出對方ê文化內容。親像tī台灣誠 sî-kiânn ê 日本作家Haruki Murakami （村上春樹）ê作品，mā只有透過適當ê翻譯，台灣ê讀者才有可能瞭解伊ê作品啊！

完全用漢字來寫台語就親像 tī-leh 翻譯，koh án-tsúann mā 無可能 ē 周全。Nā-sī 賴和無堅持用漢字，nā-sī 賴和 ē-hiáu 寫羅馬字，伊就ē-tàng完全表達出台語ê意思，伊ê母語，伊ê文化，伊ê筆，tio̍h自由--loh!

(即篇sī用來練習台文寫作ê作品，關係tio̍h賴和tsham台文ê關係，ia̍h 無經過 khah 嚴格 kap 深入 ê 研究，寫 tī-tsia 予逐家 bóng 參考。 )