細胞

Beh起厝，lán需要一 ûn一ûn ê磚仔；Thang講，磚仔是一間厝ê「基本單位」。Sio-siāng道理，細胞（セル，cell）是thong世界五花十色活mi̍h ê「基本單位」（註解一）。細胞真微細，lán若無利用顯微鏡真oh看ē著「一粒細胞」（註解二）。有ê活mi̍h kan-tann一粒細胞就ē-tàng生存，tsit款--ê是「單細胞生物」，比論ba̋i-khín ia̍h是一寡微生物（びせいぶつ，microbe）。人，動物（どうぶつ，animal），植物（しょくぶつ，plant），一寡菇菌（fungi）kap一寡微生物 ê身軀頂kuân lóng有tsiânn十粒甚至tsiūnn兆ê細胞，tsia--ê號做「濟細胞生物」。M̄管單細胞ia̍h是濟細胞生物，細胞ê基本構造lóng仝款，下面lán就來講tsit項。



在ba̋i-khín，植物kap菇菌，細胞ê第一liàn結構是複雜ê糖份來tsiânn ê「壁」－細胞壁，kap細胞壁貼ân-ân--ê是第二liàn：油質tsiânn ê雙層膜仔－細胞膜。細胞壁保護細胞，hōo細胞bē變形，形體thang維持。動物細胞無細胞壁。所有細胞lóng有ê基本構造是細胞膜（第一圖）。Tsit个膜kā提供細胞活命力ê化學mi̍h包--起-來。伊主要ê功能是控制逐項mi̍h tī細胞ê出入。細胞膜若破--去，細胞就ē死。

動物細胞，植物細胞kap ba̋i-khín細胞ê簡化圖。植物細胞kap ba̋i-khín細胞lóng有細胞壁，精差tī成份無仝。植物細胞通常中央lóng有一粒水球（vacuole）。

Hōo細胞膜包--leh ê化學mi̍h有各種ê a-bí-lo͘酸（アミノ酸，amino acid），卵白質（protein），油質，糖質，礦物質kap維生素等等－lóng是teh維持細胞活命kap人體健康--ê！除起一寡特殊情形（註解三），細胞內底上無有一个細胞hu̍t（核）。在ba̋i-khín，細胞hu̍t就是現現ê DNA（tí-ián-e）分子，其他生物ê細胞hu̍t lóng有hōo一liàn雙層膜仔包圍，膜--ni̍h tsiah有DNA分子。因為tsit層ê無仝，ba̋i-khín是「原hu̍t生物」，其他lóng是「真hu̍t生物」。

「原hu̍t生物」ê細胞結構簡單，「真hu̍t生物」ê細胞就khah複雜（第一圖）。細胞hu̍t掠外，「真hu̍t生物」ê細胞內底koh有真濟hōo雙層膜仔包圍ê細項mi̍h－號做「細胞器官」。

「真hu̍t生物」ê細胞lóng有一款號做mī-thoo-khong-tsoo-li-á（ミトコンドリア，mitochondria，簡稱MT）ê細胞器官。伊hōo兩liàn雙層膜仔包--leh，內面有家己ê DNA分子（註解四），主要ê功能是製造元氣分子ATP（è-thih-phi̍h）hōo細胞使用，細胞tsiah有活命力。MT若有tîng-tânn，細胞就無法度正常運作，lán人mā ē án-ne來破病。Lán講MT是「母系遺傳」，意思就是講，he是透過老母傳hōo囡仔，無老爸ê tī-tāi；Tsit點thang證明老母比老爸khah重要；Mā因為tsit个母系遺傳，lán ē-sái利用伊來tshiû lán查某祖ê來源。Mi-tho͘ -khóng-tsó͘ -li-á DNA（mtDNA）ê研究支持「有唐山公，無唐山媽」tsit句話，mā支持台灣是通世界南島民族上早ê源頭之一。

植物kap一寡微生物ê細胞，m̄-nā有MT，koh有葉綠體（hio̍h-li̍k-thé，ようりょくたい，chloroplast）。Kap MT sio-siāng，伊mā hōo兩liàn雙層膜仔包--leh，內面有家己ê DNA分子。葉綠體內底有葉綠素，ē吸收日頭光內底ê紅光kap藍光，kā青光反射，所致葉仔是青--ê。日頭光hōo葉綠素吸收了後，經過化學過程ē轉變做元氣分子ATP kap NADPH（ián-é-tí-phi̍h-è-tshih）。Tsia-ê元氣分子ē參與一个叫做Calvin cycle （khe-lu-bín循環） ê化學反應kā二sàng kap碳素（CO2，にさんかたんそ）ê碳原子（C）tiānn--落-來做葡萄糖。簡單講，葉綠體就是負責kā太陽能轉換做化學能ê所在。

除起MT kap葉綠體，li-poo-sóo-mù（リボソーム，ribosome）是「真hu̍t生物」ê細胞內底不止仔重要ê細胞器官。Li-poo-sóo-mù ê功能就是kā細胞內ê遺傳密碼解讀--出-來，按照特定ê密碼kā a-bí-lo͘酸一个一个鬥--起-來，tsiânn做一條長條ê phóo-li̍h-pē-pú-tài-tooh（ポリペプチド，polypeptide）。Tsit條 phóo-li̍h-pē-pú-tài-tooh看--起-來親像一條真珠phua̍h鍊án-ne，m̄-koh，伊bē是一直一條長長，伊liam-mi受各種分子力作用，áu出一定ê形體。Áu好勢ê  phóo-li̍h-pē-pú-tài-tooh tō是卵白質。Lán人ê逐个細胞內底，lóng有tsiūnn百甚至tsiūnn千款ê卵白質teh作用。

細胞ê基本結構lán約略先講到tsia。Hōo人感覺趣味--ê是：細胞ê基本結構to án-ne，無仝款ê細胞，功能哪ē差hiah濟？比論，肝細胞，神經細胞，皮膚細胞，in m̄-nā形體無仝，tī身體內所做ê代誌、任務mā差kài濟。Tsit款情形，lán就kā號做細胞ê「分化」－ 濟細胞生物tsiah有--ê。用lán人做例：lán人上早lóng是tī老母卵管（nn̄g-kńg，oviduct）內面ê一粒有形卵（ū-hîng-nn̄g，fertilized egg）。有形卵慢慢徙到子宮ê過程當中，開始ùi一粒細胞變做有tsiok濟細胞ê一丸，到子宮了後，tsit丸細胞球koh繼續湠出愈濟細胞，逐粒細胞mā開始teh行無仝款ê運命－神經、骨頭、血管、筋肉...lóng是án-ne tsiânn做--出-來-ê。Tse規个過程就是「細胞分化」。濟細胞生物ê體內，細胞一定ài經過適當ê分化tsiah ē有正常ê功能。

好好人ê身軀內底，原本分化好勢ê細胞若失分化--去，hit款就是癌細胞。細胞ê分化，功能kap失分化，lóng kap細胞hu̍t內面ê DNA分子有關係。後一pha，lán就來káng DNA。


（註解一）病毒（virus）無細胞tsit款結構，所以mā有人主張病毒m̄是活mi̍h。

（註解二）大部份ê細胞lóng真微細，m̄-ko mā是有tsiok大粒ê細胞。比論Epulopisciumfischelsoni tsit款tī紅海ê魚腸仔內生存ê ba̋i-khín，有0.02公分hiah長，目睭tsîn--leh就看ē著。有特殊功能ê細胞mā ē生做tsiok大粒，比論lán人ê身軀--ni̍h tō有超過一公尺長ê神經細胞。

（註解三）比論lán人ê紅血輪（red blood cell），因為伊ê功能需求，tī分化過程當中，伊ê細胞hu̍t就失--去-ah。
（註解四）MT有家己ê DNA分子，意思就是伊有kap細胞hu̍t無sio-siāng ê DNA 分子。MT ē用家己ê DNA去製造一寡家己愛用ê mi̍h。Tī葉綠體mā是仝款情形。



參考資料

Lodish, H. et al. 2013.Molecular Cell Biology.p.10-p.15. Katherine AhrPrker, U.S.A.

Marie Lin et al. 2009. More Genetic Sharing among Populations of Taiwan than Expected: A Plain Tribe (Pingpu) Perspective. PNC Annual Conference.

Trejaut JA et al. 2005. Traces of archaic mitochondrial lineages persist in Austronesian-speaking Formosan populations. PLoSBiol 3:e247.

（台文通訊BONG報＜2015＞252）