228小說－事變

(http://api.ning.com/files/btUhzZg0G1-e-FgcwUHYqhFlkpI680wdkvenMndjzBPX8NR*zfI7oOMkJSwdXORLQ5lJF5iZ-Ipa5KsuRNh5fF-SFvpO5rbe/228.JPG)

（這篇小說，根據人生ê真實故事改編，紀念我已經過身ê阿公、阿媽kap舅公）

事變

1.

暗時仔beh倚九點，一个婦jîn人tshuā一个七八歲ê囡仔，行出百貨公司，se̍h過兩條大路，uat入去一條巷仔內。天色雖然早就已經暗，但是路燈將規條巷仔路照kah光光光。

「阿母，阿母，你為啥mi̍h beh tshuā我來tsia？」七八歲ê囡仔攑頭問in老母。

「我beh tshuā你來揣舅公--ā，伊烘ê o͘-lián tsiok好食neh！」Tsit位婦jîn人ná牽伊ê囡仔，ná àⁿ落身輕聲kā in囝講。婦jîn人指向無外遠ê頭前，「你看，舅公tī hia！」

電報柱頂頭ê路燈發出白光，照kah規个空氣白白霧霧。街仔路有兩三个人leh行，有一台o͘-tó͘-bái uì遠遠ê所在歹tshìng-tshìng，huah kah大細聲，tsông過規條路。角仔，一間徛家厝頭前ê亭仔跤，有一擔o͘-lián擔；一个老人，生著瘦瘦矮矮，頭鬃花花白白，喙鬚短短，滿面笑容，坐踮椅仔頂leh顧擔仔位。

婦jîn人tshuā in囝來到o͘-lián擔頭前，「阿舅，tsiâⁿ久無來看--你-ah！」，婦jîn人歡頭喜面參老人相借問，「Tse gún囝，阿新牯--啦。」

「阿新牯！Tsiah大漢--ah-喔！」

「阿新牯，來，參舅公招呼」，婦jîn人對in囝講。

「舅公好！」

老人聽--著笑kah tsiâⁿ歡喜，「好、好！舅公烘o͘-lián請你食！等--一-下喔。」，老人ná講ná uì椅仔頂起身，提出已經tshiám好ê o͘-lián，kuàn-tshuàn將o͘-lián排tī火炭火頂頭ê鐵網仔來烘，「Hia koh有湯喔。」，擔仔位邊果然koh有一个大鉎鍋（seⁿ-ue），下跤一pha gá-suh火溫溫仔燒，一鼎湯不時tshìng出白煙。

老人ná烘o͘-lián，ná參婦jîn人開講--起-來。囡仔好（hò͘ⁿ）玄，一粒細粒頭，倒爿看--過-來，koh正爿看--過-去，tī-leh研究tsit个o͘-lián擔kap tsit位老大人。囡仔ká-ná雄雄想著啥，開喙講：「舅公，你哪ē一个人tī tsia啊？」

「囡仔人，無禮貌！」，婦jîn人越頭淡薄仔受氣對in囝講。

「無要緊，無要緊」，舅公講tsit句話，滿面ê笑容suah走一半--去，但是伊隨就koh歡頭喜面--起-來。舅公面容ê小可變化，其他ê人看bē出--來，阿新牯看--著，心肝suah tiô--一-下。

「阿母，我是m̄是講m̄-tio̍h話？舅公聽--著tsiâⁿ無歡喜neh？」，燒燒好食ê o͘-lián食了後，tī轉去厝ê路裡，阿新牯問in老母。

Hit暗ê月娘真圓，比街路頂往來ê車燈lóng khah光，阿新牯ē記得in老母kā講：「舅公in某kap伊唯一ê大漢後生lóng已經過身--ah，所以伊tsiah ē家己孤單一个人。咱ài常常來看伊，其他ê代誌，你tsit-má m̄ 免問，以後你大漢就ē知。」

一直到tsiâⁿ久以後，阿新牯ê舅公也來過身，伊一生ê秘密tsiah來hō͘人了解。

2.

鬥跤手處理舅公ê後事了後，阿新牯tī舅公留--落-來ê mih仔內底，發現一疊日誌 — 黃黃舊舊，看--起-來年代久長。內底逐頁lóng是用手寫ê日文。阿新牯手--裡提tsit疊日誌，感覺tse是tsiâⁿ珍貴ê資料 - 伊tsit-má已經是大學生--囉，tī學校內底，有上著台灣歷史ê課，教授tiāⁿ-tiāⁿ kā in講，beh了解歷史ê重要性，ài uì了解家己ê家族史開始。日文看無beh按怎？好佳哉，伊mā有tī-leh修日文課當做第二外國話；雖然日文程度iah-koh tsiâⁿ肉跤，伊想講慢慢來查辭典就ē-sái。

「 阿母，我kám ē-sái將tsia-ê冊提走？」

阿新牯ê老母，看著伊手提一疊ê舊冊就問伊講：「Tse啥？」

「是舅公ê日誌！」

「你beh he創啥？」

「學校ê先生講，ài gún瞭解家己厝內ê歷史。 」

「好--啦，橫直tsia-ê mi̍h無人愛ti̍h，你就提轉去做記念。」

舅公ê日誌uì大正十二年開始寫起。阿新牯ē記得學校ê教授教--過，大正時期，tī日本是leh追求民主化ê時期，所以叫做「大正民主期」，仝hit个時tsūn，mā是台灣社會運動上鬧熱ê時。但是，一个人ê運命tī án-ne ê「大時代」內底kám有起啥mih變化？冊內無講--着。伊想著舅公tī-leh賣o͘-lián ê影跡，「為啥mi̍h舅公食老ē tsiah-nī孤單？」

「舅公in兜khah早tsiâⁿ好過，koh有一間大額厝。」，阿新牯讀了第一本ê日誌，發現家己ê外嬤，舅公khah早原來lóng是富戶人。

「大正十三年，八月初九，保正來kā gún通知，講，tsia beh開一條新ê三線路，gún ê祖厝擋tiâu--leh，ài拆掉。」

「落尾，祖厝hông khà一半khah ke。為著tsit件代誌，逐家lóng來鬥參詳，分家伙。阿爸執意beh 蹛tī賰無夠一半ê祖厝內底。逐家lóng搬離開，家就án-ne來四--散。M̄-koh，tse kám m̄是開枝散葉？」

「大正十四年十一月初五，gún ê祖厝hông khà掉了後，已經經過冬外。新ê路mā已經起好，真大條，bà-suh lóng ē-sài tī頂面走。

逐家分家伙了後，猶原mā koh有聯絡。我利用分--著ê財產，開一間店賣雜貨，mā khiām寡錢，當做娶某本。

大姊kap姊夫蹛tī街仔路ê hit頭，姊夫最近參人合資開一間漢藥店，生理bē bái，二姊kap三姊最近khah少聽著in ê 消息，四姊嫁去台北，in囝taⁿ仔出世，我koh做阿舅--ah。小弟仔已經去內地讀冊半冬--囉，希望伊一切順序。」

阿新牯khai tsiâⁿ濟時間來讀舅公ê日誌。讀到tsia，伊看著一个家族ê變化 —  tī時代ê潮流下，規个家族不得不散了了。M̄-koh，舅公並無因此變做散赤人，伊開一間 kám仔店，koh過五冬，舅公娶某，生囝 — 伊唯一ê後生再策。一切看--起-來lóng tsiâⁿ順序 — tse是平凡人ê簡單生活，tuè日頭起落來食睏。

連suà幾若本日誌lóng是差不多ê生活紀錄，阿新牯感覺tsiâⁿ無趣味。忽然間，阿新牯看著舅公有一本日誌ê年代竟然是寫「中華民國」，伊感覺奇怪；若按照年代排落來，上早是大正，koh來是昭和；昭和二十年hit本日誌後面開始，年代雄雄變作「中華民國」；寫中華民國三十六年ê日誌是上尾--à一本！阿新牯將tsit本日誌小可仔掀一下，發見tsit本日誌只有頭前幾若十頁有寫mi̍h；tuì正--月寫到三月初；上落尾hit工ê日期是三月初九，後面有幾若十頁，ná親像有寫過mi̍h，後來koh lóng li̍h掉--去。

阿新牯自án-ne特別將tsit兩本記錄昭和二十年到中華民國三十六年三月初ê日誌提出來斟酌讀。無了解--ê，伊就走去問in老母 — in老母就kā伊所知影ê代誌講hō͘ 聽 - 規个故事tàu--起-來，阿新牯總算了解影響舅公一生上大ê代誌；tse使伊心疼、驚惶，koh憤慨。

3.

阿福--à ê心情最近變化tsiâⁿ大。

Hit-tsūn伊聽著la-jí-o͘h，天皇宣佈日本戰輸投降ê玉音傳--來，心內真歡喜。看著in囝tuì中學校轉--來，憂頭結面，就問in囝講是發生啥mih代誌？In囝講：「今仔日學校無上課，因為先生ê心情lóng tsiok bái，有ê koh leh háu；先生講，咱大日本國戰輸，逐家lóng m̄敢相信。阿爸，tse kám有影？」阿福--à就kā in囝講：「有影，in日本人戰輸--ah，in就ài離開，咱台灣人beh出頭天--ah！」In囝無理解tsit句話ê意思，兩蕊目睭kā阿福--à金金siòng。阿福--à笑笑kā講：「來，我kā你講，台灣人m̄是日本人。Khah早我bat聽過文化協會ê講演，in講.....」阿福--à雖然冊讀無濟，但是早前文化協會ê美台會leh放美國電影，伊有去鬥鬧熱，文化協會辦ê講演，伊mā有去參加，tsia-ê活動算是伊智識ê啟蒙，伊tsit-má就kā伊所知影ê智識講hō͘ in囝聽。

過無偌久，阿福伯--à聽著消息講，中國派--來ê代表tī台北接受日本投降。軍隊入來台北城ê時，tsiâⁿ濟人lóng有去kā in迎接，koh有人用北京話編一首歌教逐家唱，表示逐家lóng tsiâⁿ歡喜戰爭結束，歡迎中華民國。Hit首歌ê歌詞是án-ne-siⁿ：

台灣今日慶昇平，仰首青天白日青。

哈哈！到處歡迎，哈哈！到處歌聲。

六百萬人同快樂，簞食壺漿表歡迎。

哈哈多是歡迎，哈哈多是歡迎。

阿福--à kā in囝講：「日本人若走，咱台灣人就bē koh受著壓逼。中華民國參咱是仝國--ê，所以你ài好好仔讀冊，將來一定ē出頭天！」。伊tsit-má ê心情ná親像烏陰天過了，出日ê時，心中有滿滿ê ǹg望。啥人知影liam-mi就beh天狗食日？

為著beh迎接台灣ê未來 — 中華民國，台灣tsiâⁿ濟所在lóng有人出來教逐家講北京話；有ê人是免費leh教，有ê人趁tsit个機會來趁寡錢。阿福--à參in囝mā走去大菜市仔內底一位教冊先生hia來學講北京話。再策掠做家己過去認賊做老爸，將家己當做是日本人，tse使伊tsiâⁿ歹勢koh tsiâⁿ憤怒！所致，伊m̄-nā積極leh學北京話，後來koh走去參加三民主義青年團。

幾月日後，代誌開始起變化。阿福--à發覺伊ê kám仔店生理愈來愈bái，mih仔愈來愈貴。

有一工，阿福--à看著三个穿軍衫ê查埔人入來到店內。

Tse是最近兩三工tsiâⁿ罕得有ê人客，m̄-koh，tsit三个人一入來店內，就開始鬼鬼祟祟，神神祕祕，阿福--à自án-ne提高警覺，斟酌kā tsit三个人看tiâu-tiâu。

Tsit三个查埔人tī細細間仔ê店內，tsit爿看過來koh hit爿摸過去，tshi-tshi tshū-tshū m̄知leh講啥。其中一个查埔人雄雄用北京話大聲講：『這裡沒有我們要的東西，走啦！』講了，三个人越頭就uì門跤口行--去。

「É！」,阿福--à大聲huah！

三个查埔人聽著阿福--à ê huah聲，走ná飛--leh。

阿福--à跤手liú-lia̍h，衝過就kā其中一个人khiú-tiâu，「Kàn！」『這什麼這什麼？！』阿福--à用bē輾轉ê北京話大聲kā tshoh，大力將查埔人ê手siak--開，一罐豆油khiang一聲，siak落塗跤，重紅ê豆油ná血，流kah規四界。

『你偷拿豆油！』「Tsit-má siak歹--ah，錢提--來！」『給錢！』，阿福--à tsiâⁿ 受氣，台語，北京話，濫濫做一伙。

三个查埔人相對看，年歲khah大ê hit个koh kā阿福--à gîn，大聲講：『錢，我們會賠，你記住是誰拿你的醬油，到我們營裡來拿錢。』

阿福--à小可gāng--一-下niâ，hit三个查埔人就tsông出門，目一下nih，走kah無看見人影。

4.

透早，厝角鳥仔比人khah早起，已經tī leh互相答喙鼓，吵kah真鬧熱。再策食早頓了，出門行去學校上課。阿福mā將大門拍開，準備開始營業。

伊行出門，掃帚提--leh，開始piàⁿ掃亭仔跤，看著阿琴－in大姊，uì遠遠ê所在行--過-來。

「阿姊！你真gâu早！」

「福--à，你mā gâu早！你tsiah早就開店，啊最近生理好--無？」

「生理無leh thang偌好--啦，he阿山仔一來，我本底想講應該逐家ē好過日khah tio̍h，顛倒愈害--喔！」

「僥倖--喔！米是咱人逐日lóng需要--ê，但是有ê米店生理suah愈來愈bái，tuì頂個月開始，koh欠米neh！」

「啥！Án-ne講--起-來，咱日子m̄就beh koh-khah歹過？」

「舊年tsit時tsūn，米一斤tsiah兩sián，現此時，米一斤已經起kah八kho͘外--囉！」

「聽講是唐山hit爿leh相刣，in家己米無夠食，suah kā台灣ê米lóng買過去in hit爿。」，阿福--à將伊聽--著ê消息kā in大姊講，「阿姊，姊夫漢藥材ê生理kám有受着影響？」

「聽伊講，藥材tsit-má ê價siàu tsiâⁿ kuân，照理講，若賣--出-去應該是真好價；M̄-koh，tsit-má ê價siàu suah kuân kah無人買ē起。進--入-來ê藥材，囤tiâu---leh，囥kah kiōng-beh生蟲--ah。」

兩个人講著tse，心情沈重--起-來。

時機bái-bái，人心浮動。

Tī學校內底，學生ê心情mā掠bē tiāⁿ。

再策是高雄州第一中學校ê學生，tse是hit-tang時上好ê學校；學校內底ê青年有志，除了讀冊以外，in上有熱情--ê就是關心kap議論國家社會大事。

Tsit段時間以來，再策一直leh思考「如何面對家己」tsit个問題。Khah早伊當做家己是日本人，老爸後--來kā伊講，伊m̄是日本人，伊參中華民國tsiah是仝國ê人；M̄-koh，自從中華民國來台灣了後，除了生活khah歹過，報紙頂頭，街頭巷尾，lóng看ē著、聽ē著官員uai-ko、欺壓百姓，一寡五四三ê代誌。

「咱台灣人一定ài有自覺，團結--起-來，kā長官公署請願，要求in ài約束官員，改革制度！」，一陣學生圍做伙leh討論時局，再策kā逐家講伊ê看法。

「M̄-koh，咱ê先輩khah早khai十四冬ê時間向日本政府請願設立台灣議會，落尾mā是無成功？」一个學生提出伊ê看法，表示向政府請願可能只是ke了工。

「Tio̍h--啊，gún厝內ê序大人講，狗去豬來，中華民國參日本政府ná有啥無仝？」另外一个學生表示同意頂一个學生ê看法。

「咱是台灣人，m̄是日本人，mā m̄是中華民國人！」一个學生雄雄徛--起-來，tsiâⁿ激動án-ne表示！

隨就有人出聲提出無仝ê看法。十喙九kha-tshng，一陣學生討論規半晡mā無結果；不而過，in ê心情已經lóng ná燒水tī-leh tshiāng-tshiāng滾，隨時lóng有可能phū--出-來！

5.

無意外，衝突總算tī台北城爆發--囉！無偌久，透過la-jí-o͘h放送，風聲傳遍規台灣。社會上ê局勢變kah非常緊張，有人huah講beh kā阿山仔全部趕轉去唐山，mā有一寡社會上ê頭人出面希望局勢趕緊平靜--落-來，koh向政府提出逐種改革ê要求，mā有風聲講，唐山hit爿已經beh派軍隊來台灣--ah。

阿福--à參再策kap in大姊一家伙lóng轉來到祖厝內，心情緊張leh圍爐食飯。

老大人 — 阿福--à kap阿琴in老爸 — 先講話：「我食到tsit个歲，萬項世事lóng看--過。過去，阿本仔橫霸，tsit-má，阿山仔惡質；咱台灣人lóng是歹命人--啊。」，講到tsia，老大人規半晡無koh出聲，逐家mā lóng m̄敢講話；一時之間，規間厝恬tsut-tsut，ka-taⁿ siān蟲仔leh háu奈何。

「阿琴，」阿福--à講，「你是m̄是有tī廟埕賣薰？」

阿琴聽著伊án-ne問，規个人緊張--起-來：「你mài烏白亂講！」

「大姊！你ài老實kā gún講tsiah tio̍h，gún lóng是為著你ê安全設想。」，阿福--à tsiâⁿ嚴肅kā in大姊講。「Tsit擺就是因為賣薰ê婦jîn人kap阿山仔警察發生衝突！聽講，hit个婦jîn人hō͘阿山仔拍kah規頭規面流血流滴，逐家看阿山仔án-ne食人夠夠看bē做--得，欺負咱台灣人，連婦人家to m̄放伊煞，代誌tsiah ē規个爆發--起-來！」，阿福--à講到落尾有淡薄仔激動，伊suà落去講，「大姊，你若有賣無了ê薰ài緊提去藏--起-來，m̄-thang hō͘ in tsang--著，無，是ē害著恁規家伙neh！」

「我知--啦！」，阿琴m̄敢看阿福--à ê目啁，tshìn-tshìn-tshái-tshái kā應。

老大人吐一口氣，講：「恁轉--去，厝內ê mi̍h件收hō͘好，人bih--起-來。Tsit个時tsūn，拄著代誌ài吞忍，bē-sái賭強，等待風聲若過，咱tsiah來重做拍算。」

「阿公！」，再策雄雄講話，「我bē用得bih--起-來！Gún一中ê學長已經準備去提銃，gún beh組自衛隊來kap in捙拚，bē-sái hō͘阿山仔看咱台灣人無！」

逐家聽著tsit款話，lóng驚一tiô，阿福--à kā再策ê手khiú-tiâu--leh，tsiâⁿ激動講：「你leh講啥？我不准你做gōng代誌！」

再策將阿福--à ê手pué--掉，徛起來講：「Gún台灣ê少年人若無徛--出-來，台灣就無人--ah-啦。」

阿福--à心肝結規丸，阿琴kā手貼tī阿福--à ê肩胛頭，對再策講：「策--à，你斟酌想，恁老母已經過身，恁老爸賰你一个後生，你就千萬m̄-thang去冒險--啊。」

再策喙齒根咬ân-ân，一句話to無講。

老大人講：「好--ah-啦！Lóng mài吵！食飯皇帝大，先食飯，食飽恁tsiah-koh去冤！」

一頓飯，就tī氣氛tsiâⁿ bái ê情形下進行。飯食了，烏雲mā拄好tsa̍h著月娘。

6.

Hit工是烏陰天，透風koh落雨，阿琴一世人to buē放buē記--得。

 早時七八點，阿琴kā in翁講，緊去店內，將值錢ê mi̍h款轉來厝藏hō͘好，若無，恐驚hia唐山兵ē去搶。In翁聽了，就趕緊去伊ê漢藥店。

阿福--à透早起--來看無再策，就知影代誌害--囉。伊真無奈，m̄-koh mā是ài緊將mi̍h仔kap一寡錢款--起-來，來去阿琴in兜bih。

當leh款mi̍h件ê時，kám仔店ê大門suah hō͘人tsàm--開！阿福--à攑頭看著三个人tsông--入-來，iáu未看清楚來--者何人，其中一个有淡薄仔面熟ê人，提一枝烏烏ê銃，銃頂頭koh有縛一支白siak-siak、冷ki-ki ê刀，tsit个人一句話to無講，行向阿福仔，就án-ne將刀仔uì 伊ê腹肚tshiám--落-去！阿福--à唉一聲摔倒tī塗跤，重紅ê血uì腹肚tsuāⁿ--出-來，流kah規sì-kè。這時，阿福--à聽著一句北京話：『肏你媽個屄！拿瓶醬油也要錢？』
阿福--à倒tī塗跤，半昏迷半清醒，感覺肚子邊燒燒，ká-ná有mi̍h件一直phû出來。
『將他拖走！』
阿福--à感覺腹肚燒燒，身軀suah愈來愈冷；頭殼麻麻，規个人beh飛--起來；雄雄，伊想beh飛suah飛bē去，啥mi̍h mi̍h件真ân、真ân，將伊束縛－ti̍t-beh bē喘氣--啊，身軀若親像hông切做幾若塊，四周圍lóng teh振動。
～～～

仝tsit个時tsūn，阿琴taⁿ kā大門關好鎖好，一枝長長圓圓烏烏ê銃管，suah ùi門縫硬tshiàm入來。阿琴著驚，退後幾若步，壁邊ê窗仔竟然去hông ùi外口挵破，又koh一枝銃管伸進來，tú-hó拄著阿琴ê尻脊骿。

阿琴吸一口氣，規身軀凊汗拚出--來，徛leh，m̄敢tín-tāng。

『有沒有人？』

『屋子裡的人通通給我出來！』

幾若个查埔人leh用北京話大聲嚷，阿琴lóng聽無，只是驚，徛leh，m̄敢tín-tāng。M̄知發生啥mih代ê囡仔，看著家己ê老母奇怪ê模樣，目睭thí kah 大大蕊。

門雄雄hō͘人大力挵--開。七八个阿兵哥攑長銃pin-pin-piàng-piàng tsông--入-來，阿琴ê大漢後生kap查某囝驚kah háu--出-來。阿琴雄雄狂狂將全部ê囡仔lóng khiú來家己身軀邊；面對tsia-ê軍人，伊ê聲音雖然ē tshuah，猶原大聲huah：「恁beh創啥！？」

『把家裡的男人都給我叫出來！』一个軍人用tsiâⁿ歹ê口氣講北京話。

阿琴聽無，只是將伊ê囡仔愈khiú愈ân，一擺koh一擺大聲huah：「恁beh創啥！？」、「恁beh創啥！？」

『瘋婆子！全部給我押到外面去！』，徛tī門跤口ê一名軍人，看--起-來是軍官，對內底ê兵仔下命令。

幾若个兵仔，用銃相（siòng）tuì阿琴kap囡仔，強逼in行出門，來到亭仔跤跪--落-來。囡仔愈háu愈大聲，兵仔根本無leh tshap-siâu--in，koh提一條大條索仔，將in規家伙ná肉粽仝款縛--起-來。

開始落雨--ah。

雨水冷ki-ki，沃tī阿琴kap囡仔 ê頭面參身軀。阿兵哥tī in ê身軀邊提銃行來行去，一直問in：『男人呢？』、『把家裡的男人都給我叫出來！』

阿琴ê大漢後生一直háu，伊ê查某囝倚tī伊身軀邊，ná háu koh一直叫：「阿母！阿母！」阿琴tsiâⁿ驚惶，伊想著家己腹肚內iah-koh有一个未出世ê囡仔，m̄知是查埔ia̍h是查某？伊心一橫，對伊身軀邊ê囡仔講：「M̄免驚，阿母tī tsia。Beh死，咱做陣死！」阿琴ê目屎一直流、一直流，親像雨一直落、一直落，伊心內一直kā腹肚內ê囡仔會失禮：「可憐ê囡仔，你bē赴出世，m̄是阿母無愛--你，咱做伙落來陰間，阿母仝款ē kā你惜命命。」

7.

阿琴ê翁婿一路細膩，來到漢藥店，趕緊將一寡錢kap珍貴ê藥材khian落去lok仔內，隨就beh走。

行到藥店大門，門未tsîng開，就聽著ná leh放炮仔ê銃聲。伊tio̍h驚，將正手爿ê窗仔開一縫仔囝，想beh看外口到底是啥mih情形；一看不得了，外口街仔路無半个人，suah有五个唐山兵仔攑銃leh烏白掃，到tsia來，伊顛倒m̄敢走，兩枝跤phî-phî-tshuah。過一站仔，銃聲停止，伊想講應該安全囉，uì窗仔縫koh kā看--出-去，伊看著三个唐山兵拄leh kā 一門機關銃鬥tī跤架仔頂！Tsit聲無走bē用--得，若是機關銃鬥好開始掃射，到時按怎走to走無路！伊只好kā mi̍h件phiaⁿ--落，將大門sak--開，規个人像箭仝款衝--出-去，拚命一直走！

『嘿！那邊有一個男人！』

唐山兵發見著阿琴in翁，提銃開始對伊ê方向放銃子。阿琴in翁對附近ê路真熟，隨就閃過銃子，nǹg落去隔壁麵擔仔ê桌仔跤；一nǹg--落-去，伊險險仔叫--出-來，「Kàn！Tse m̄是阿狗？」桌仔跤倒一个人，兩蕊目睭金金，身軀有五六个銃子空，血iáu bē完全焦，看--來是tsiah死無偌久。阿琴in翁一粒心tsháiⁿ kah kiōng-beh piak--開，想beh歇喘--一-下，『那邊！那邊！』唐山兵ê huah聲suah koh傳--來，銃聲mā隨tân，兩粒銃子彈著麵擔仔，阿琴in翁想：「橫直人總是ài死，kā伊拚啦！」隨著kā頭mo͘h--leh，身軀khû低低，衝--出-去！
麵擔仔隔壁是阿水in兜，大門竟然無關。銃子逐來ē咬人，阿琴in翁頭mo͘h leh就tsông ùi阿水in厝裡；厝內一个人to無，伊àn大廳tsông到後壁，看著一張大門床，跋倒做狗爬，趕緊nǹg去眠床跤bih。
伊聽著銃聲；mā聽著唐山兵進來厝內ê跤步聲，驚kah跤冷手冷， m̄敢喘大氣koh驚家己心臟tshi̍k了傷大聲。規間厝安靜起來，無夠兩分鐘，伊聽著有人leh哀。
『抓到了！』
是阿水！
伊ê哀聲真淒慘，愈來suah愈細聲。唐山兵ê跤步聲mā tiām--去。

阿琴in翁tī眠床跤ê烏暗中bih足久以後，才敢慢慢爬出來，滿面全豆花；一路閃，一路bih，uì細條巷仔se̍h轉來家己ê厝。

伊m̄敢行大門，只好àn後壁門偷偷仔suan入去厝內。一入去，就聽著阿琴tī頭前廳leh大聲huah。「Hāi囉！」伊心內驚惶，bih tī後壁m̄敢出--來。

Koh過tsiâⁿ久，外口一點仔聲說to無。Tsit時，伊tsiah uì後壁liam跤liam手來前廳。伊看著阿琴坐tī椅仔頂，規个人軟kô-lô-sô，兩个囡仔坐tī塗跤leh hiⁿ-hiⁿ-háu，目箍隨就紅起來。

「阿琴！」

阿琴攑頭看--伊。兩个囝仔mā看--伊。

規家伙仔四个人隨攬tiâu-tiâu，大聲háu。

「阿爸！你哪ē tsit-má tsiah轉--來？Gún hō͘歹人欺負--ah，你kám知？」，阿琴ê大漢後生ná háu ná kā in老爸tâu。

In老爸目屎一直流一直流，親像外口落bē停ê雨，親像beh kā心肝底hit个pit-sûn補--起-來，suah永遠補bē起--來。

Ná leh擂戰鼓ê挵門聲雄雄響起，規家伙仔四粒心隨沈落海，逐个人lóng gāng--去，無人敢去應門。

挵門聲koh再一擺傳--來，外口有一个婦jîn人leh huah：「阿琴--啊，是我啦，肉圓嫂啦！緊開門囉！」

阿琴緊tsông去kā門拍--開，看著肉圓嫂徛tī外口，伊tsham肉圓嫂同齊開喙：「你有要緊--無？」

「無代誌就好，無代誌就好！」阿琴kā肉圓嫂ê雙手gīm-tiâu-tiâu，目屎又beh koh liàn--出-來囉。

「啥mih leh無代誌！恁小弟，恁小弟.....」肉圓嫂thih-thih-tu̍h-tu̍h講bē落--去。

「Gún小弟？啥mi̍h？阿福--à按怎？」阿琴緊張--起-來。

「有人看著阿福--à伊，hō͘唐山兵縛--起來，規身軀lóng血，一路kā拖去中都hit爿，m̄知是生iah是死。」

阿琴一聽，kiōng-beh hūn--去。In翁隨講，「緊！咱緊來去kā救--轉-來，無的確伊koh有一口氣tī--leh。」
「你bē使去！」肉圓嫂隨kā擋，「hia唐山兵看著查埔人tio̍h開銃--neh！」

「無，阿琴你緊去叫大姨kap三姨！」

話講煞，阿琴越頭就去揣大姨kap三姨－in就蹛tī隔壁niâ。阿琴in翁緊動手將門枋規片拆--落-來，通好去將阿福--à扛--轉-來。
阿琴in三个查某人，扛著一張大門枋，緊張kah kiōng beh死。一路上，已經無看著唐山兵，街頭巷尾慢慢仔有人出來行動。經過一間塗kat厝頭前，看著一个查某人跪tī塗跤，哀爸叫母，háu kah面青面綠，in m̄敢ke問，khah緊行--過-去。後--來聽講，he是教冊先生in某，唐山兵kā教冊先生硬拖，koh將伊拍kah死死hūn-hūn--去；m̄知hō͘拖去佗位，後來就lóng無消無息。

趕到中都窯廠附近，阿琴險險koh beh昏去；hia有三四枝電火柱，每一枝電火柱頂lóng縛著一个人，血，ùi每一个人ê身軀phû出來，將電火柱染kah紅kì-kì，塗跤滿滿是tìm紅。

「福--à tī-tsia！」，阿琴ê大姨代先看著阿福！
阿福身上ê衫褲lóng已經破kah毋成樣，伊ê腹肚頂ham胸坎ē跤竟然koh有兩个明顯ê hō͘刀仔tshiàm--落去ê空喙。伊ê頷頸已經bē tsih力--啊，一粒頭墜--落來到胸前，看--起來已經無teh喘氣矣。阿琴行倚--去，伸手來摸阿福--à ê頷頸，huah一聲：「Koh有脈--neh！緊kā 放--落來！緊kā tshuā--轉-去！」逐家隨過來鬥跤手將縛tī阿福--à身上ê草繩仔tháu開，koh kā伊囥起lih門枋頂頭，三个人就án-ne將半小死ê阿福--à扛轉去厝裡。

8.

「Tse，就是gún舅公ê故事，tse，就是影響伊一生上大ê事變。」Tī leh上台灣近代史ê時，阿新牯kā逐家報告in舅公ê故事。講煞，因為故事siuⁿ過使人tio̍h驚，台仔跤ê同學suah lóng恬恬。

教授行來台頂，對同學講：「各位同學，因為時間有限，咱tsit-má開放五分鐘hō͘逐家來問問題。」

一个查某囡仔沓沓仔將手攑--起-來，教授將話筒提hō͘--伊。伊問講：「再策--leh？你無交代。」

阿新牯回答講：「舅公ê日誌後來mā lóng無交代再策ê下落。我問gún老母，伊kā我講，自從hit工揣無再策，in就臆講伊可能半暝偷走--出-去，參加一中ê自衛隊囉。後--來，一中發生真激烈ê戰鬥，聽講學生大部份lóng戰死，in就認為，再策應該是發生不幸--ah。一中就是tsit-má ê 高雄中學，舊ê建築物頂頭猶原有銃子拍--過ê號--neh。」

Koh一个查埔同學攑手來問問題，伊問講：「228事件已經經過tsiah-nī久，政府mā lóng有hō͘受難者補償，過去傷心ê代誌無應該koh一直提起，你ê看法按怎？」

阿新牯想--一-下，然後講：「舅公kap gún阿媽，in lóng無提著任何ê補償金。我問gún老母是為啥mi̍h？伊講，in lóng無去申請補償，因為ē驚，in已經對tsit个政府完全無信任囉。我認為，歷史上發生ê代誌，除非公平kap正義ē-sái得著實現，若無，koh-khah濟ê補償金mā無意義。」

「Koh有人有問題--無？」教授講，「若無，我tsit-má來做一个結論。阿新，你且先轉去坐。」

「研究歷史，有兩件上重要ê代誌，第一是理解過去，第二是建立史觀。我tsiâⁿ歡喜阿新今仔日tī tsia參咱來分享in舅公ê故事。228事件，發生到taⁿ已經超過一甲子囉，tsit个代誌，若無發生tī咱iah是咱ê 親人身上，咱beh 如何來理解tse是偌khok-hîng ê代誌？好加哉阿新用伊身軀邊親人ê故事來kā逐家講，hō͘咱有機會來進一步理解tsit个時代ê悲劇。史觀，m̄ tāⁿ是解sueh人類過去ê行為，回答歷史ê跤跡niâ，史觀，上重要是hō͘人有反省kap進步ê空間。」

教授繼續講：「Tsit个悲劇是按怎造成--ê？咱看著現代化ê台灣拄著內戰ê中國，咱看著講台語ê人拄著講北京話ê軍兵，咱看著貪污腐敗ê官員kap哀哀tsi̍p-tsi̍p ê百姓。所以咱ē-sái用文化衝突來理解228事件。咱tī其中mā看著無公平、國家暴力kap genocide — 種族屠殺。咱ē-tàng uì tsia來建立咱ê史觀。」教授小可停--一-下，然後繼續講：「所以，m̄，“228事件kap伊適當ê史觀”就是恁後禮拜ài教ê報告啦。」

規班ê學生聽到上尾仔hit句話，lóng「喔～」一聲。拄好下課ê音樂聲tân起，學生就開始收冊包。

阿新牯一爿收mi̍h，一爿想，舅公恬恬平凡來過一生 — 雖然是一世人艱苦，伊m̄-bat kā任何人埋怨--過 — 伊ê苦，是tsit个無正義ê政府壓逼來造成--ê。Tsit-má阿新牯將舅公ê故事寫--出-來，伊ài hō͘逐家知影，「大時代」折磨無聲ê個人，只有uì過去ê歷史學著教訓，真正來實現公平正義，「台灣人」tsiah ē出頭天--啊！

（原連載tī台文通訊BONG報第219~224期）
（2013/02重修）