身體ê構造

生物學（せいぶつがく，biology）有兩項基礎ê khang-khuè，1項是解剖學(かいぼうがく，anatomy)，1項是生理學(せいりがく，physiology)。解剖學ê目tik，tō是beh瞭解身體逐位ê構造kap in互相ê關係；生理學ê目tik，tō是beh瞭解身體逐位ê功能kap in作用ê原理。因為構造kap功能關係真bā，kā tse 2項kat--起-來，lán tō thang對人體有基本ê認bat。（註解一）

幾若ê系統 (system) tsiah tsiânn做lán人ê身體，包括：循環系統，lîn-pah（リンパ） kap 免疫（めんえき）系統，骨骼系統，筋肉系統，神經（ しんけい）系統，hoo-lú-bóng系統，泌尿系統，生殖系統，消化系統，呼吸系統kap皮膚系統。逐个系統to有伊專行(hâng) ê功能，m̄-koh，系統kap系統ē sann影響，mā ē sann幫贊。

幾若ê臟器 tsiah tsiânn做1 ê系統。比論講循環系統，mā有人叫伊做心血管系統，因為伊tō是lán人ê心臟，血管/血筋，kap血做伙tsiânn做ê一个系統。心臟是循環系統內底上重要ê器官，lán用伊做例來看無仝系統之間ê關係。心臟beh跳，需要筋肉系統。筋肉系統包括hōo心臟ē得跳ê心肉（Cardiac muscle），hōo lán人ē得自由振動ê骨肉(Striated muscle) kap hōo胃腸家己ē得振動ê滑溜肉(Smooth muscle)。心臟beh好好仔跳，伊本身tō需要循環系統 - 循環系統ê主要功能tō是kā滋養料送到身體ê逐所在，心肉 nā beh 健康，tō需要循環系統kā滋養料送--來，心臟tsiah ē-tàng 親像phàng-phuh án-ne，kā血suh--入-來koh tshui--出-去，hōo循環系統ē-sái正常運作。心臟koh需要神經系統ê訊息kap hoo-lú-bóng系統ê化學物質來調伊跳ê節奏。Uì心臟ê運作，tō thang看筋肉，神經、循環、hoo-lú-bóng，tse 4个系統互相交插來完成生理任務。

其他系統：lîn-pah kap 免疫系統 - 包括lîn-pah-kńg (リンパ管)，lîn-pah-kat，lîn-pah液kap各種白血球 (就是免疫細胞)；泌尿系統 - 包括腰子，輸尿kńg，膀胱，尿道；生殖系統，tsa-poo tsa-bóo無仝款，在tsa-poo是lān-hu̍t（testis）為主，在tsa-bóo重要--ê是卵巢kap子宮；消化系統 - 包括胃，小腸kap大腸；呼吸系統 - 包括肺，肺kńg kap支肺kńg；皮膚系統 - 包括皮膚kap皮膚發--出-去ê mih (毛，髮，指甲)；皮膚是人身（jîn-sin）上大ê器官，伊 ē調節lán-ê體溫，kā lán-ê身軀khàm--leh，防止身軀因為tsheh--著lòng--著等等受直接ê傷害。

人體ê系統簡介了，suà--落-來，來講器官。器官mā ē-sái講做「器」，親像目睭是視器，舌是味器，肺是呼吸器，胃kap腸仔是消化器án-ne。逐个器官to有伊特殊ê功能，目睭用來看mih，舌用來tam鹹酸苦甜甘，肺是lán suh空氣入--來，交換「sàng素（O2）」kap「二sàng kap碳素（CO2，にさんかたんそ）」ê所在，胃腸是lán食mih入--來，kā hia-ê mih磨koh lù創kah幼kôo-kôo thang 消化，tsiah koh吸收營養分ê所在（註解二）。

人ê身軀ē-sái分做幾ê部位。頭kap頷頸，軀幹 ，koh有四肢。頭是lán人上重要ê所在，hia有頭蓋（skull）mā有人講做頭殼碗 - tsit-ê tīng-tīng ê碗內底tō是貯kap保護 mî-mî軟軟ê腦髓，包括大腦，小腦等等ê器官。頷頸tsih-tsài頭，hōo伊ē-tit tín動se̍h轉，頷頸mā是連接頭kap軀幹ê部位。軀幹內底分做2 ê大腔（khang）- 胸坎（thoracic cavity）kap腹肚（abdominopelvic cavity） - 腹肚分做腹腔（abdominal cavity）kap盆跤骨腔（pelvic cavity）。重要ê器官lóng貯tī tsia-ê腔--ni̍h。骿仔骨（rib）kap胸骨（sternum）將肺臟，心臟hām幾條大條血管保護tī胸坎--ni̍h。肝，膽，腰尺，脾，腰子，胃，小腸，大部份ê大腸，lóng tsinn tī腹腔--ni̍h。膀胱，tsa-poo tsa-bóo ê內生殖器官（註解三），大腸ê khah尾截lóng tī盆跤骨腔--ni̍h。軀幹連四肢，上肢是1雙手，下肢（hā-tsi）是1雙跤；軀幹連kah手股ê關節是肩胛頭，kap大腿相接ê所在是kái-pinn。

知iánn臟器tī軀幹內底大約ê位置對自我檢查有時tsiânn有幫贊。比論講腹肚疼，是正手爿，倒手爿ia̍h是腹肚尾teh疼，意義tō無仝。大部份ê人，臟器tī身體內約略是án-ne ê位置：胸坎內面正爿倒爿lóng有肺臟，心臟偏向胸骨ê倒手爿。胸坎kap腹腔ê kat-kài有橫隔膜（tō是肝連肉）。腹腔頂kuân偏正爿，是肝臟ê位置，肝ē面偏倒手爿，tō是胃，胃ē面，kap腹腔ê大部份空間，lóng是小腸，hōo tsia臟器kheh tī腹腔上正手爿kap胃ē-kha小腸tíng-bīn--ê，是大腸。Lán thìng-hó參考圖來對照。

人體臟器ê位置。Tī chit 張圖--ni̍h，骨頭lóng無畫--出-來。Koh有，腰子tī背後，無畫，胃ê後壁倚ē-bīn ê所在是腰尺，倚頂面偏向倒爿是脾，tsia lóng無畫。特別ài斟酌，解剖學講ê脾kap漢醫講ê脾雖然名稱仝款，m̄-koh功能無仝，凡勢是無仝ê臟器。

對人體án-ne ê認bat是beh進1步瞭解lán身體構造kap功能ê基礎。有tsit款基礎認bat mā希望對逐家ê健康維持有補所。



（註解一）「生物，解剖，生理」tsit 3 ê名詞ê語源lóng是日語。Uì日語轉換來ê語詞，lán ē tī 後壁加上hi-lá-ga-nah（平仮名，ひらがな）。

（註解二）胃主要ê 功能是khiām mih kap消化1部份ê營養素，小腸tsiah是主要ê消化kap吸收營養素ê臟器，大腸主要ê功能是吸收水分kap產生屎。

（註解三）Tī軀幹外口--ê，比論lān-hu̍t，tō是外生殖器官，tī軀幹內底，比論子宮，tō是內生殖器官。


參考資料：


李文森，1989。解剖生理學。頁3-33。台北，華杏出版股份有限公司。

Berne M. R. and Levy N. M. 1996. Principles of phsiology. pp. 709, 719. Mosby-Year book, Inc.

Tortora J. G. and Dearickson B. 2009. Principles of anatomy and physiology. pp. 1, 12-18. John Wiley & Sons, Inc.

（台文通訊BONG報＜2015＞251）