Siàu念ê滋味

有一回，guá有兩个外國朋友，千里迢迢飛來遊台灣；絕大部份ê時間，in lóng家己四界踅，自由行，感受台灣豐富溫暖ê人情味。特別是in去庄跤所在ê時，hia真濟方面lóng無親像大都市tsiah-nī便利，兩个大姑娘koh一句講to bē曉話，guá真驚in phàng見，siánn知in後--來耍kah真歡喜；原來，雖罔話語bē通，但是in tú著食穿iah是交通ê問題，hâm熱情ê台灣人比跤畫手就lóng解決--囉！

In來台灣一月日，tú好踅台灣一lìn。來到中部，guá算是地主，自然ài tshuā in規四界luā-luā-sô。Hit當時，guá無注意tio̍h，tsit-má想起來，心內感覺真ài笑。

In來到guá-ê地頭 - 台中；頭一工ing-àm，guá想講來請in食tsi̍t-ê特殊ê台灣菜。Beh食啥mih--neh?踅夜市仔，凊彩食？路邊擔仔khû-leh就sà？這lóng無適當。一來，夜市仔國外mā有（雖罔真濟人lóng掠準kan-ta台灣才有夜市仔）；當然無仝國家ê夜市仔各有特色，但是，人疊人，相kheh燒；五花十色ê擔仔，beh食beh啉beh耍，隨在你 ，這款情形tī各國ê夜市仔內底lóng是仝款--ê - án-ne，夜市仔顛倒無法度凸顯出台灣ê特色。二來，若是講，請這兩位國外來ê大姑娘食路邊擔，假若koh傷過凍霜honnh？落尾，guá決定請in食真有台灣特色ê - 火鍋，食kah飽！

按怎講食kah飽ê火鍋真有台灣特色--neh？台灣以外，幾若个亞洲國家mā是lóng有火鍋這項mi̍h阿？M̄-koh，台灣食kah飽ê火鍋店有別人無ê特色：首先，in用真濟台灣在地ê食材，鮮koh好食；另外，店內一般lóng koh ē準備熟食，比論芳貢貢ê滷肉飯，iù-mī-mī koh ē tshìng煙siânn--人ê細粒包仔；iáu koh有冰枝，aisukhulimuh，各種涼水，上奇巧ê tshiookhooletooh噴泉；tsia ê食物不但真豐沛koh真多樣，hōo人客感覺若leh食無討，而且不止享受着火鍋，更加koh享受著幾若種無仝ê滋味；一般時行ê「buffet」餐廳koh khah su伊一氣。除了食物，上重要ê，lán ê 食kah飽火鍋店ê環境lóng創kah真四序 - 火鍋燒燙燙，熱烘烘，頭家無惜本錢，冷氣tio̍h kā催落去，人客奇怪，食燒湯koh bē流汗，顛倒真秋凊 - 因為án-ne，tī台灣m̄管是寒人熱人，lóng真適合去食火鍋！火鍋店提供ê肉類一般有豬肉，牛肉，雞肉，羊肉，lóng切kah真大範，hōo人看著就起枵鬼性；但是guá-ê朋友in食菜無食肉，好佳哉，各種青菜mā lóng總有。In m̄-bat看過芋仔，guá就kā in解說半晡in才敢提來試食；木耳，in mā m̄-bat看過，in看著木耳一片一片軟sìm-sìm koh假若khiū-teh-teh，suah掠準he是某一種肉類，害in m̄敢食！經過guá努力ê解說，in才敢ngeh來煮，想bē到一食就tiâu--leh - 規頓飯，in m̄知食偌濟木耳？

隔轉工，gún tshuā in先去鹿港，koh去北港。鹿港古城是真出名，本地kap外國ê觀光客lóng知影來tsia tshit-thô；guá-ê朋友耍kah真歡喜，順suà koh買寡有當地特色ê四秀仔，一路行，一路食。Tī鹿港老街內底踅ê時，in雄雄看著一款m̄-bat看過ê食物，看起來是焦料，一片一片捲起來，koh用塑膠橐仔té。In問guá he是啥？Guá就近一看，tsit-ê mi̍h生kah若豆皮，m̄-koh，suah是豬皮tsìnn！In一聽著，面tshiunn隨改變，感覺「豬皮tsìnn」真是不可思議ê食物！

離開鹿港了後， gún搬車搬beh五點鐘，人lóng gōng面去矣，才到北港（雖罔地圖頂面鹿港到北港真近，但是交通非常不便啊）!到位ê時，所有ê店lóng早就leh歇睏--矣，gún只好去買泡麵來食；對這對外國來ê姑娘仔來講，食「台灣泡麵」又koh是tsi̍t-ê真稀罕ê經驗。Tsit-má真濟國家lóng有泡麵（mā有人講是速食麵），甚至tī歐洲國家koh有將長條--ê iah是長管--ê spaghetti做成泡麵，燒水沖落去，hip五分鐘，就ē-sái食啊。不而過，比較起來，iah是lán台灣泡麵ê詼諧上濟mā上好食。泡麵是一位日本時代ê台灣人，離開台灣，釘根日本以後所發明--ê；án-ne講起來，泡麵mā算是「台灣之光」？台灣上早ê泡麵tio̍h是uì日本進口入來ê「生力麵」，仝時tsūn，mā有台灣家己製造上市ê「維力麵」，隨後koh有通人知ê「統一麵」上市，一直到tsit-má，市面上已經有濟濟無仝品牌kap口味ê泡麵，而且lóng俗koh大碗；大碗！這是台灣泡麵上重要ê特色！其它國家ê泡麵通常lóng無夠看mā無夠食；若囥傷濟燒水，一碗麵就變kah真大碗，但是伊ê湯就無滋無味，若是燒水囥無夠濟，凊彩囫兩喙tio̍h食了--矣。這款泡麵，án-tsuánn ē 合台灣人ê口味？Lán台灣人食物件ài食巧koh食飽，lán ê泡麵自然ài有夠份量mā ài有夠好食！

北港睏一暝，隔工一透早，gún tshuā朋友來去看天后宮kap水仙廟；著！北港m̄是kan-ta天后宮niā-niā，hia有幾若間廟，lóng是真有歷史ê古蹟，lóng反映出台灣人ê信仰kap文化生活。踅古蹟，當然mā ē腹肚枵，tsit-siann，真正tio̍h ài請in兩位大姑娘食路邊擔--囉（因為庄跤所在揣無大飯店）。Ē-tsái九點外，gún揣著tsi̍t-ê oo-tsí-sáng，駛一台車，停tī路邊，桌仔椅仔凊彩排好，就leh賣早頓；oo-tsí-sáng ê 生理bē bái，人客來來去去，真濟lóng是早頓買好就kuānn leh走，mā有ê人來買早頓，順suà koh kap oo-tsí-sáng開講，看起來是老主顧。Gún揣位坐好，做伙ê tsi̍t-ê朋友是tī當地teh做建築物研究ê學者，伊tī北港已經蹛過tsi̍t-tsām-á，tō推薦gún試啉當地ê豆奶，伊講，tse氣味真tsán， tsham別位無仝--ooh！有影to-tio̍h，北港ê豆奶真好啉，兩位外國美女啉kah喙笑目笑；一開始，beh請in啉豆奶in koh真躊躇，因為， in ê國家tsit-má mā有豆奶通啉 - 電視廣告lóng講豆奶是真健康koh營養ê飲料，所以當地「啉豆奶」koh khah贏啉牛奶 - 但是這種健康豆奶真歹啉，過濾了無tsiâu-tsn̂g koh無參糖，啉起來有澀澀ê滋味，bē輸teh啉藥仔；lán台灣人真歹想像，豆奶ná ē-tàng做kah tsiah歹食？

Hit工ing-àm，gún koh來去食宵夜 - 燒圓仔湯 - in hit對姊妹仔感覺這是真奇巧ê點心，一爿享受着燒圓仔湯ê好滋味，不時koh顯露出神秘ê笑容。Gún猶原tī北港天后宮ê香客大樓蹛一暝，隔轉工就beh離開。離開北港了後，研究建築ê朋友駛車tshuā gún去看幾若間古早ê廟寺。Beh倚中晝ê時，台灣人腹肚枵--矣，開始四界揣mi̍h食；tsit-ê時tsūn，lán ê外國朋友，顛倒對食物一點仔興趣to無，in kan-ta對四周圍ê人情事物好玄，腹肚一點仔lóng  bē枵？

到tsia，guá雄雄發現，gún這陣台灣人原來自頭到尾，m̄管行到tuē，lóng leh揣mi̍h來食！M̄管腹肚ē枵bē枵，時間到，tio̍h ài食！

是--阿，lán台灣人確實是真ài食mā真重食ê一群人！「食物件」- hōo食物kap喙舌跳一段浪漫ê探戈，經過kap喙齒激烈ê戰鬥，送落去腹肚內－斟酌kah想，這件代誌對lán來講，恐驚m̄是kan-ta án-ne niā-niā。

Lán tī真濟特殊ê時間點kap場所lóng ē來「食物件」。一般人ē食三頓；早頓是lán一工氣力開始ê源頭，早頓mā有重要ê精神意義，食過早頓，就是提醒lán ài開始骨力來做今仔日ê穡頭；中晝頓，是lán一工內底體力ê補充，tú好mā提醒lán辛苦規ē-tsái，來歇睏tsi̍t-ē，將ē-tsái-sî kap ē-poo-sî隔開，有重新出發，繼續拍拚ê意思；規工ê khang-khuè做suah，人輕鬆，心頭開，就是lán來食暗頓ê時tsūn，食飽就ē-tàng睏--loh；lán ê一工，uì食飯開始mā tī食飯後結束，án-ne敢m̄是真完滿？現代人因為活tī工商發達ê時代內底，食飯無一定照三頓食，食飯ê意義mā有真濟變化。比論講， 趕上班bē赴食早頓，ē-tsái腹肚枵枵，tsit時就ài食點心，一方面補充體力，一方面心內竟然ē因為食著點心來感覺趕上班ê辛苦受着安慰。Koh比論講，中晝頓，凡勢是公司tng-teh開會ê時，不但無法度歇睏，無定着koh ài hōo頂司罵，食物件就無滋味去--矣。暗頓--neh，可能便當凊彩囫兩喙，就koh繼續趕khang-khuè ê進度，mā有可能公司koh ài開會，或者是為著生理上ê往來，必須陪客戶食飯；橫直，tī工商時代內底，大部份ê「食飯」lóng已經kap khang-khuè kô-kô-tînn，分bē開--loh。Kap親人iah是kap朋友做伙食飯，無需要討論工作上ê代誌，ē-tàng享受親情友情ê溫暖，ē-tàng khuann-khuann-á來食物件，這種食飯ê光景，恐驚是現代人上欣羨上需要--ê honnh？

窮實，「食物件」對台灣人來講，若親像tsi̍t-ê儀式。M̄管tī-sî，mā m̄管啥mih狀況，食物件，lóng是為著beh滿足某某目的；食物件ê過程就是teh通過tsit-ê儀式ê過程，一但通過儀式，人生就若親像進入另外tsi̍t-ê階段；食飯前，食飯中kap食飯後，這是三種無仝款ê滋味--矣，你若無斟酌體會就真無彩！因為食物件tsiah-nī重要，古早人早tio̍h講過，「食飯皇帝大」；這種觀念mā不止深刻來影響着lán「食」ê文化！

「食物件」因此親像tsi̍t-ê文化ê記認，ù tī lán家己to m̄知影ê內心深處。當guá少年時，孤tsi̍t-ê人踮國外讀冊－就是tī hia，熟識tio̍h hit對姊妹仔，koh有真濟外國朋友。心內tiānn-tiānn思念台灣好食ê物件。Tsit-má科技發達，siàu念親人kap朋友，透過網路就ē-tàng講電話甚至看著形影；但是想beh食ê物件suah是按怎lóng食bē著--矣！Ē記tit頭一冬tī國外生活ê時，hit種koh硬koh無滋味ê pháng，iah-sī學寮內hit種鹹kah摃死賣鹽--ê ê料理，guá是為著生存才來硬吞硬食；後--來，開始家己學煮麵－白麵加豆油－tse是guá tng當時食過上好食ê物件--阿！時間一長，熟識ê台灣留學生mā khah濟，逐家三不五時ē有聚會；聚會中討論ê話題lóng ē tsham台灣ê食物有關係；有時tsūn，gún ē特別來料理台灣ê食物做伙食，上簡單ê，是逐家來包水餃，上複雜ê，bat有人用心計較，使用有限ê材料，做出台灣口味ê肉圓！

Guá離開故鄉，才知影故鄉ê滋味正是hōo guá上siàu念ê滋味。外國朋友來台灣，lán請in食在地料理，tuì in來講是leh食奇巧，是趣味ê經驗；但是tuì guá來講 －guá 已經瞭解－tse每一喙lóng是kah guá ê生命縛tiâu-tiâu ê故鄉ê滋味，踮故鄉食着，每一喙lóng hōo guá心中充滿感恩，tī他鄉食着，每一tshuì lóng充滿感動kap滿足。

台灣料理好食，m̄-koh，食濟，gâu大箍。Guá心甘情願。