Pe̍h-ōe-jī（白話字），台灣基督長老教會內 ê 兄弟姊妹普普仔 lóng 知 chit 項，m̄-koh，看有讀 bat ē-hiáu 寫 ê 人 soah oh-tit 有。會內兄弟姊妹 ē-sái 輾轉使用台語 ê 人 bē 少，但是，掌握台語讀寫 ê 人 soah 真少。Pe̍h-ōe-jī kap 台語 tī 教會內底 lian--去 m̄ 是一時一刻 ê 代誌；in 親像長期失水 ê 大樹 liâu-liâu-á teh 死。到底 ūi-siáⁿ-mi̍h ē án-ne--neh？
歷史 ê 證據現現 tī hia：ùi《台灣府城教會報》成立到 taⁿ，超過一半 ê 時間，chit 份報紙 lóng 是用 Pe̍h-ōe-jī teh 刊行。1960 年 858 號 ê 《台灣教會公報》，雲龍先生有發表一篇〈關係白話字問題所感〉，伊講：「若禁用白話字，就教勢 ê 發展，信仰 ê 進步不止有問題。」「白話字 ê 貢獻 m̄ 是小可，此後教會教育應愛加強教白話字是最要緊 ê 問題。」總講一句，Pe̍h-ōe-jī 是長老教會 ê 傳統，是教會 chit 叢大樹 ê 根，根 tī--leh chiah ē-tàng 連接久長歷史 ê 教示，吸收 phong-phài 文化 ê 養分。
Pe̍h-ōe-jī 除了是教會重要 ê 文化資產，更加 chiâⁿ 做現時 lán 傳承母語、多元文化 ê 重要工具。凡勢大部分 ê 人掠準 Pe̍h-ōe-jī kan-taⁿ 是用來寫台語 nā-tiāⁿ，soah m̄ 知 ùi 1932 年北部教會 ê 報紙──《芥菜子》tō 開始有一欄「Kóng-tung-chhýk thong-sín（廣東族通訊）」，內文是客語 Pe̍h-ōe-jī。進一步，lán mā 知 Pe̍h-ōe-jī ē-tàng 用來寫台灣各族 ê 原住民語，一寡原住民語 ê 聖經翻譯──Amis，Tao，Rukai，Atayal，Truku……，有--ê 已經完成，有--ê koh teh 進行。Pe̍h-ōe-jī hō͘ 台灣各語言 ē-tàng hông 寫--落-來，thn̂g--落-去，chia-ê 語言 kap 文化 chiah bē hō͘ 華語淹--死；設使有一工 lán 台灣人出喙 kan-taⁿ ē-hiáu 講華語，無仝語言無仝文化無仝思想 ê 多元台灣 tō 消失 kah 貼底--ah，hia-ê「多元」lóng 囥 tī 博物館內底 hō͘ 人懷念──chit 款 ta-khok-khok ê 未來敢是 lán 所向望--ê？Chit-má 已經有 chiâⁿ 濟少年人 bē-hiáu 講台語，甚至 mā bē-hiáu 聽！Lán ài 鼓勵 in 骨力學 Pe̍h-ōe-jī，in ài kā「母語」當做外語來學，iáu-bē 出世 ê 未來囡仔 chiah 有 thang 得著（acquire）母語！
Lán nā 學 ē-hiáu Pe̍h-ōe-jī，lán tō 有 thang 去讀其他族群 ê 語言，koh 進一步 tō 有才調去學 in-ê 話語。Nā kan-taⁿ 倚靠聽 beh 去學別族 ê 語言 ē khah 慢，nā ē-sái 透過 lán-ê 腦 kap 手 kā 話語變做字，寫--落-來，學習 tō ē 加真濟效率。Án-ne，Pe̍h-ōe-jī 敢 m̄ 是 chhan-chhiūⁿ 一座橋，hō͘ lán ē-tit 行到 hit-pêng 岸，去看無仝 ê 光景，聽無仝 ê 聲音，了解無仝 ê 文化；lán m̄ 是徛 tī chia teh 關心 hia ê 人文 niā-niā，透過 Pe̍h-ōe-jī，lán koh ē-tàng kā 家己 chhāi tī hia，開闊心胸，互相了解，án-ne，台灣 chiah 是一个真正多元、phong-phài、五彩 ê 國，日頭光 chiah 真正 ē 照著每一个人！
1969 年，國民政府正式禁止 Pe̍h-ōe-jī ê 使用，而且 koh 沒收各種版本 ê Pe̍h-ōe-jī 聖經。第二次世界大戰了，國民政府實施 in-ê 語言教育以後，強迫逐家 ài 講「國語」，到 taⁿ，母語使用 kiu 退 ê 惡果已經出現。國民政府使弄 lán講「國語」chiâⁿ 做逐家 lóng 講 ē 通 ê 語言，tō bē 輸 hit 隻毒蛇誘惑人食 hit-hō 禁果──人掠準 án-ne tō 有智慧 ē-hiáu 分善惡，結果是一切罪 ê 開始；lán 掠準逐家 lóng 講「國語」蓋方便，結果是毀滅 lán-ê 歷史 kap 多元文化，hō͘ lán 心肝焦澀 ê 開始。Pe̍h-ōe-jī kap 台語（kap 各種母語）tō tī 國民政府偏差 ê 政策之下，長期失水，liâu-liâu-á teh 死。
我本人今年 iáu-bē 40，m̄ 是台文系所出業，koh 是 tī 華語環境內底大漢--ê。我 ê 阿公阿媽一位講客語，一位講台語，我到 20 thóng chiah 著驚家己真 bat 華語、英語、德語，soah m̄ 知家己 ê 話──台語！Kiám-chhái Pe̍h-ōe-jī 是早有 chhoân 便，透過學習，chit-má 我 chiah 有 thang 了解 lán 正正 ê 語言，歷史 kap 文化，chiah bē hō͘ 華語來把縛。我有榮幸 tī 教會做 Pe̍h-ōe-jī ê 教師，mā tī 教學 ê 過程內底確實知影 chit-hāng 事工 ê 重要。向望諸位兄姊珍惜 che 教會 ê 文化資產，重視 lán 母語文化 ê 傳承，做伙來 kā Pe̍h-ōe-jī 學好勢！
（本文刊tī教會公報3304期，圖片版權屬教會公報社）
沒有留言:
張貼留言
這篇文章讓你有什麼感覺/感想呢？請讓我知道。