學台語羅馬字書寫應該ài有ê觀念

聲音檔（讀台文猶無慣勢ê朋友請用聽--ê）


       逐家leh學台語書寫ê時，毋管leh學傳統ê教會白話字，抑是教育部標準ê台灣羅馬字，請恁一定ài有正確ê觀念：白話字佮台羅lóng是「字」，毋是「拼音」。若beh拼音，就用IPA(國際音標)，用IPA記音，相對正確，而且國際通用。

        請逐家ài論真看待羅馬字，kā伊當做書寫工具來使用。
 
        誠百冬前，國際音標猶未發達，西洋傳教士用羅馬字來記錄台語ê發音，毋過，tsit-má to有發達ê國際音標來做記音工具，羅馬字自然ài進一步成做台語文書書寫標準ê基礎。
 
        Koh因為文字本身就是kā聲音抽象表達ê符號，所以羅馬字ê書寫無應該綴無仝腔口ê變化來變化。親像頂面講--ê，腔口變化應當用IPA來記錄。

        台語書寫標準化，毋是beh消滅台灣各地方各樣ê腔口差別。書寫標準化是beh hōo台語文ê文學性koh khah成樣。就親像過去歐洲各國mā經過hit-ê kā in 家己ê語言書寫統一，標準化ê歷史過程仝款，「腔口」袂因為書寫標準化suah來消失。