母語叫醒gún ê靈魂

算--起-來，gún 是文化失落 ê hit沿。按怎講neh? Gún 是客人，tsiâⁿ細漢 ê 時tsūn，ē-hiáu淡薄仔客語，大漢去學校讀冊了後，suah來變做bē-hiáu講；Gún tī下港大漢，四周圍lóng聽 ē著台語；細漢ê時tsūn mā tsiâⁿ gâu講（káng），去學校受教育了後，愈講 suah 愈bē輾轉。若m̄是gún後--來家己有堅持使用母語，tsit-má m̄-nā是母語ê tsheⁿ-mê牛，更加是é-káu。現此時，gún tī 學校內底教書，面對-- ê 卻是一陣é-káu ê tsheⁿ-mê牛－－絕大多數 ê 學生，除了華語以外，已經 bē-hiáu 講，甚至bē-hiáu聽台灣人 ê 母語--ah！

所以 tsit-má ê教育制度真大ê功能就是消滅台灣各族群ê母語。

Gún堅持使用母語，是離開台灣了後ê代誌。當四周圍lóng是「外國人」ê 時tsūn，為著生存，為著參in溝通，gún必須ài學in-ê語言，但是koh-khah按怎學，mā無可能親像「外國人」講家己ê母語hiah-nī輾轉；kap中國留學生講話ê時，雖然逐句華語lóng聽有，但是其中 ê 無仝一直hō͘ gún tsiâⁿ無自在；比論講，in leh講笑話，逐家笑kah tsiâⁿ歡喜，但是gún m̄ 知笑詼 tī佗? Hit當時，tī án-ne ê孤單、生份ê環境內底，gún m̄知我是啥mih 人? Gún開始來思考，我到底是啥 mih 人？

我是啥mih人？Tse是一个認同ê問題。Tī台灣ê時tsūn，四kho͘輾轉lóng是「台灣人」，逐家一直lóng吵吵鬧鬧，顛倒欠缺「台灣人」tsit个身份存在ê感覺；你若是去街路頂 tshìn-tshái 問--人，伊 ē kā你講，「我是台灣人」，但是台灣可能只是一个地理名詞ia̍h是其它無清楚 ê 概念啊！

我是啥mih人ê答案必須 ài 家己去揣，因為自細漢到大漢所受ê教育lóng是leh教我「應該ài 做啥 mih 人」－－tsit種自我認同ê過程是被動--ê，是被塑造--ê，欠缺反省kap思考。所以，gún 開始去揣 tsit个答案。按怎揣？Tuì參別人無仝ê所在去揣，答案就tī其中。歷史ê跤跡就是咱參別人無仝ê所在－－咱ê先祖tī tsia生湠，累積在地ê智慧，發展出特殊ê文化，「番薯m̄驚落塗爛，只求枝葉代代湠！」，成就--ê，kám m̄是咱tsia-ê囝孫？

歷史文化具體 ê 表現，除了物質 ê 產品，上主要--ê就是語言啊！一款語言－－m̄-taⁿ是語言ê發音，koh有伊ê使用方式，反映出一个族群ê宇宙觀、性命觀、價值觀以及生活形態－－ 無論是過去ia̍h 是tsit-má。所以，語言就是咱參「阿tok仔」kap「中國人」無仝ê所在。到tsia，gún 總算揣著實實在在 ê 認同感--lo͘！我ê母語，聲聲句句leh叫--gún 「精神--起-來-啊！」、「hong-hí-lòi-á」！

Tsit-má ê教育制度真大ê功能就是消滅台灣各族群ê母語，簡單講，就是消滅台灣人ê靈魂。

Tī世界母語日進前，李江却台語文教基金會成立十五週年ê時，我聽著台灣人ê靈魂leh大聲huah，m̄管環境有偌困難，咱lóng ài 維持咱ê活力kap堅持咱ê志業，一路向目標邁進－－tī 新ê時代中，傳承咱文化中ê智慧，開創咱文化ê活力。

（本文獻hōo 2012李江却台語文教基金會十五週年生日）